■ गझल : बोलत असतो खोटे आपण...

गझल : बोलत असतो खोटे आपण...

बोलत असतो खोटे आपण
किती वाहतो ओझे आपण

खूप पुढे गेली ही दुनिया
खूप राहिलो मागे आपण

ज्या झाडाची मुळे हरवली
त्या झाडाची पाने आपण

कधी कधी कवडीमोलाने
विकले आहे सोने आपण

कधी जुनी उघडून डायरी
वाचत बसतो पत्ते आपण

काळे आपण मातीहुनही
सोन्याहुनही पिवळे आपण

तेव्हा भरले आपण भाडे
आता भरतो हप्ते आपण

जळते आहे चिता आपली
धरले आहे मडके आपण

ऐकत नाही मन अजूनही
किती द्यायचे चटके आपण

कोणी येइल वाटत नाही
बंद करूया दारे आपण

- वैभव देशमुख